solidarität bruuchtum lozärner fasnacht: rüüdig härzleche dank, liebe fasnächtler!

Es esch e bsonderi Zyt gsi, wo üs alli i de letschte Woche ond Mönet betroffe hed. Früeh hemmer müesse igseh, dass es 2021 kei Fasnacht cha gä, ond hend im September alli Aaläss wie Fasnachtsumzög, Fasnachtsmäärt ond Usgüüglete abgseit.

Drom hemmer i euch, liebi FasnächtlerInne, d Fasnacht welle heibringe. So met de Fasnachtsplakette vom Roger Stalder ond em Fasnachts-Magazin, wo mer wonderbari Gschichte rond om d’Lozärner Fasnacht hend chönne verzelle.

Üsem Motto «HAUPTsach Fasnacht» hemmer bald e nöie Fokus gä: met
de Solidarität em Lozärner Bruuchtum Fasnacht wärded gezielt Fas-
nachtsschaffendi onderstötzt, wo wäg dere Pandemie kei Ufträg hend.
Mer danked euch rüüdig härzlech för die Fasnachtssolidarität. Alli, wo
Plakette ond Fasnachts-Magazin kauft hend, leischtet diräkt e Biitrag.
Üse Dank god aber au a Guuggemusige, Wagebauer, Einzelmaske ond Familiegruppe, sprich a alli Fasnächtler, wo trotz blüetendem Härz dehei blobe send ond d Fasnacht of e anderi, kreativi – gar digitali – Art usgläbt hend.

Im Dank ischliesse wemmer die, wo e bsondere Chrampf gleischtet hend: d’Fasnachtsgewaltige, d’LFK-GL ond -Delegierte, s’OK Fasnachts-Magazin ond s’OK Usgüüglete onderwägs, genauso wie üsi Partner, wo d’Lozärner Fasnacht i vielne Arte düend onderstötze.

D’Lozärner Fasnacht esch drom so einzigartig, well mier s’mitenand düend erläbe ond gniesse, aber erscht rächt, wemmer muess zämestoh wie das Johr.

I dem Sinn fröied mer üs bsonders of de SchmuDo vom 24. Februar 2022, ond öberhaupt of d’Fasnacht 2022! HAUPTsach Fasnacht!

Dani Abächerli & Dani Bühler

LFK-Präsident & LFK-Weibel 2021